نەجیب بالایی
پێشییێ، دڤێت بهێت زانین کۆ ب سایا هەبوونا تەڤگەرا (پەـکەـکە) ژ کۆمپلۆیا ١٩٧٥ێ یا لدژ کوردان هەتا نوکە، وەلاتێن سەردەست
نەشیاینە لۆزانەکا دی و ١٩٧٥کا دی ئەنجام بدەن…سەرۆکاتییا (پەـکەـکە) گەلەک جاران د داخوەیانیێن خوەدا گۆتبوو:”ئەم ژبۆ پاراستنا دەستکەڤتیێن ستاتۆیا باشوورێ کوردستانێ ل وێ هەرێمێ نە”. (هەلبەت گەلەک جاران خەلەتی چێبووینە و ئەو خەلەتی ئێکئالی نەبوون، بەلکۆ ئالیێن پشکدار هەر هەمی خەتابارن) لێ ئەو ڕەوشا نوکە پەیدابوویی و ئەتمۆسفیرا کۆ نوکە کورد تێدا دەرباز دبن هەتا ڕادەکی جهێ دلخوەشییێ یە بتنێ (لهەڤنەکرن و ئاڤانەکرنا حکومەتا نوو یا هەرێما کوردستانێ جهێ خەمباریا هەر کوردەکێ دلسۆزە) لێ ئەڤە نە مژارا مەیە.
گەلەک شرۆڤە، دانووستاندن و گەنگەشە، لسەر چەکبەردانا (پەـکەـکە) و خوەهەلوەشاندنا وێ دا دهێن کرن.
ب چەند تێبینی و خالان و ب کورتی ئەزێ ڕامانا خوە یا سادە بێژم:
دڤێت کۆ وەها بسادەیی ل ڤێ پرۆسەیێ نەهێت نێرین، (پەـکەـکە) د زێدەتری ٤٠ سالاندا گەلەک تەجرۆبە د وارێ شە، ئاشتی، دیالۆگ و ئەولەکاریێ دا پەیدا کرێنە، (پەـکەـکە) ژ بۆشاهییەکێ وەها بساناهی بڕیارا چەکبەردانێ و خوە هەلوەشاندنێ نادەت و بێژیت فەرموون مالا وە ئاڤا هەر ئێک ژ وە هەڕن مالا خوە.
بەری چەندین سالان، ئیستیخباراتا ئەلمانی ڕاپۆرتەک لسەر سیستەم و ڕێکخستنا (پەـکەـکە) وەشاند و بەحسا گرێ و ئالۆزی و زەحمەتییا چوونا د ناڤا وێ ڕێکخستنێدا کر، هەلبەت چ ئیستیخباراتێن جیهانی نینن کۆ هەولنەدایی بچن د ناڤا سیستەمێ رێکخستنێن (پەـکەـکە) دا، لێ هەتا رادەکی ئەو سازیێن ئیستیخباراتی سەرکەڤتی نەبوون ژ بلی گرتنا ئۆجەلان ئەو ژی بپشکداریا بهێزترین سازیێن ئیستیخباراتێن جیهانی، هەروەها حەزا ئۆجەلان بخوە کۆ د هەڤدیتنەکا ل ڕۆما دا کۆ ئەم چەند کەس سالا ٢٠٠٠ێ ژ ئەورۆپا چووین مە ل ڕۆما دیت وی ب ئەشکەرا گووت:”پرسا کوردی ئێدی نە ل کۆچبەریێ، نە ل شام و ئەسینا و ڕۆما یان جهەک دی چارەسەر دبیت، ئەڤ پرس دڤێت ل ئەنقەرێ چارەسەر ببیت!”.
1- د بانگا (پەـکەـکە)ێ دا یێ ب کووراتی لێ بنێریت دێ زانیت کۆ (پڕپەیامی) و (یەکئارمانجی) د ڤێ پرۆسەیێ دا هەیە. ئالیەک نەرم دکەت و ئالیێ دن گەف و خۆرتبوونا خوە ڕادگەهینیت، باسکێ جەمیل بایک و کالکان نەرمبوونێ و ئاپۆیزمێ نیشان ددەن، باسکێ مۆراد قەرەئیلان و گەریلایان خۆرتبوونا لەشکەری و نەتەوی و بەردەوامییا شەڕ نیشان ددەن ئەگەر کۆ دەولەتا تورک لگۆر هند شەرت و مەرجان تەڤنەگەڕیت.
2- شەڕ ١٠٠ ساڵان ژی دۆم بکەت دووماهی هەر دیالۆگ و ئاشتییە، هەم (پەـکەـکە) و هەم ترکیا ژی ڤێ دبێژن، لێ ترکیا کۆ هێزا وێ یا لەشکەری یا دوویێ یە د هەڤپەیمانیا ناتۆ دا ژ خوە ب زەلالی نابێژیت ئەم دێ دگەل (پەـکەـکە) روونین و دیالۆگێ بدەین دەستپێکرن، وێ ژی چەند ئەگەرێن خوە هەنە وەک: ئەردۆگان ب دەهان جاران گووتییە مە (پەـکەـکە) ژناڤبریە، بۆ پراسی ستۆیریا خوە نەشێت بشەڤەک و ڕۆژەکا بێژیت ئەم دێ دگەل(پەـکەـکە) لهەڤ بکەین، ئەو دخوازیت رەوشێ نۆرمالیزە بکەت و دێ گەلەک وەختی کێشیت، هێزێن نەتەوەپەرست و پارتیێن هەڤدژی (ئاکەپە) مۆزایەدا نەتەوپارێزیێ ل هەمبەر ئەردۆگان و (ئاکەپە) دکەن کۆ چاوان ب (تەرۆریستان)را دیالۆگێ دکەت و گەلەک سەدەمێن دی.
3- چەکبەردانا (پەـکەـکە) ژ بۆ کوردان هەم باشە و هەم خرابە. باشە ژبەر کۆ کورد ل باکوور دشێن ب خەباتا سیاسی زێدەتر کاریگەر بن و جهێ خوە د جڤاکا تورکیدا بکەن و زێدەتری سەدان ئەندامان بشینن مەجلسا ترکیێ. خرابە ژبەر کۆ ترکیا نە یا باوەریێ یە، دخوازیت هەر دەلیڤەکێ بکار بینیت بۆ ژناڤبرنا پرسا کوردی، (هەلبەت (پەـکەـکە)ژی ژ ڤێ ئێکێ غافل نینە و ب تایبەت ڕێبەرێ وان ئۆجەلان سایکۆلۆژیا ترکیێ باش خواندی یە) هەروەها خالا خراب ترکیا یا کۆ مەشغۆلی (پەـکەـکە) دێ دەرفەت بۆ هەلکەڤیت کۆ لدژ تەجرۆبا باشوور کۆ رەوشەکا قانۆنی- دەستووری د دەولەتا ئیراقێ دا هەیە، هەولا دەک و دۆلابان لدژی دەستهەلاتا باشوور ئەنجام بدەت و یا ئەز ژێ د ترسم ئەڤە!
4- دڤێ پرۆسەیێ دا دەنگێ بەرپرس و سەرۆکاتیا هەرێما کوردستانێ بلندە و هند هێزێن ناڤنەتەوی ژی شاهد و چاڤدێرن.
5- جارا ئێکێ یە، ڤێ پرۆسێ دەنگڤەدانەکا ناڤخوەیی، هەرێمی و جیهانی هەیی، ئەمەریکا، ئێکەتییا ئەورۆپا، نەتەوێن ئێکگرتی د شەخسییەتا سکرتێرێ گشتی گۆتێرەس بخوەدا پشتەڤانی ل وێ پێنگاڤێ کرییە و ب کەیفخوەشی پێشوازی ل بریارا (پەـکەـکە) کرن، ئەڤەژی کرێدیتەکا سیاسی یا زێدە ددەت وێ تەڤگەرێ، ئەڤ بانگێ (پەـکەـکە) بێ بەرسڤ بمینیت ترکیا دێ یا زیانبەخش بیت.
6- بارێ ڕۆژئاڤا سڤک دکەت و وان هەمی بەهانە و ئەرگۆمێنتێن ترکیێ بۆ دەستتێوەردانێ ناهێلیت.
7- لگۆر داخوەیانییا هند بەرپرسێن (پەـکەـکە) و (پژاک)ێ کۆ (پژاک) دێ لسەر خەباتا چەکداری بەردەوام بیتن هەتا کۆ ڕەوشەکا دێفاکتۆ یا وەک ڕۆژئاڤا بۆ وان ل کوردستانا ڕۆژهەلات پەیدا دبیت، ب تایبەت ئەگەر دیالۆگا د ناڤبەرا ئەمەریکا و ئیرانێ دا تێکچوو.
8- ڤەگەڕیانا سەر گۆندان کۆ وەکە هەرێمەکا پەڤچوونا شەڕێ دناڤبەر هەردوو ئالیاندا هاتبوون ڕاگەهاندن و ژ ئاڤەدانیێ بێ باهر ببوون کۆ ژ ئالیێ ئابووری، ئەولەکاری، گەشتییاری و مەعنەوی ڤە گەلەک فایدە بۆ هەرێمێ و کوردان بگشتی دێ هەبیت.
9- د ڕەوشا تەناهیێ دا، پەیوەندی و هاتنوچوونا کوردێن باشوور و یێن باکور ب تایبەت ڕێزا سنووری دێ وەسا بهێز کەڤیتن کۆ ئێدی سنووران واتەیا خوە و باندۆرا خوە نەمینیت. هەلبەت بدەهان خالێن دن یێن پۆزەتیڤ هەنە کۆ کورد دێ ژ وێ پرۆسەیێ سووندمەند بن، لێ دیسان ژ مەترسی و خەتەریان ژی بێ بەهر نابیت، بەس یا گرنگ ئەوە کۆ د ئەدەبیاتێن (پەـکەـکە)ێ دا ژ دەما ئاڤاکرنێ هەتا نوکە گەلەک لسەر (غەفلەتێ) و هشیاریا ل هەمبەر کۆمپلۆ و پلانان ڕاوەستیاینە، بەرێ ئۆجەلان بخوە دگۆت:“ئەم خرابکەرێن لیستک و پیلانێن سەردەستانین”.
10- خالا گرنگ یا دووماهییێ، سۆیند و سۆزا (پەـکەـکە) یا بداویکرنا کۆنگرەیا 12ـ ێ گەلەک گرنگە، دشێی وێ سوندێ وەک مانۆفەستۆیا سۆزا نەتەوی و کوردایەتی و مرۆڤایەتیێ حیساب بکەی! هەروەها بەری کۆنگرا 12-ێ و ددەما کۆنگرێ دا نڤیسەک لسەر ناڤێ (ئۆجەلان) ب شێوازێ هەلبەستێ هات وەشاندن، ئەو نڤیس لسەر ناڤێ زارۆیێن (ڕحایی) ئاراستەیی هەمی زارۆیان هاتبوو کرن، ب نێرینا من ئارمانج ژێ بەردەوامی و رادەستکرنا پەیاما (پەـکەـکە) ێ یا (نفشێ) نوویە، هەروەها هەژمارا (195) تێدا هاتبوو، گەلۆ ئەو هەژمار کۆدەکێ نهێنی یە؟ یان ژی ئارمانجەک تایبەت ژێ هەیە؟
کۆرت و کرمانج: ترکیا لگۆر پێنگاڤا (پەـکەـکە) هاڤێتی بهێت رایێ دێ هەم ترکیا، هەم کورد و هەم هەرێم هەر هەمی سوودبەخش بن، بەرۆڤاژی دێ بیت مالوێرانی…لێ ئەم ب نیەتسافی و نێرینەک گەشبین ل پرۆسەیێ بنێرین!!!