د. زوبێر رەسوول
پێناسەکا گەلەک گشتی و بەربەلاڤ بۆ کارێ سیاسی هەیە ئەوژی؛ گەلەک جاران بۆ هونەرێ ئەوا ژ دەستێن تە دهێت (فن الممکنات) یان ئەو بژاردەیێن د دەستێن تە دا تۆ دێ شێی چی بدەستڤە هینی؟ ب واتایەکا دی ئانکۆ یارییا چنە، یان هەموو(zero-sum game) دڤێ یاریێ دا هەردەم ئەگەرێ شکەستنێ پترە ژ سەرکەڤتنێ! ل ڤێرە ئەوا رۆژئاڤا کری د هەمان دەم دایە، کارەکێ عەقلانە بوو، هەلبەت قەت د ئاستێ وێ قۆربانیدان و ئازایەتیێ دا نەبوو کو کوردان پێشکێشی دەڤەرێ و جیهانێ کری، لێ ئێدی یاسا و رێسایێن ناڤدەولەتی چۆ جاران د بەرژەوەندییا هێزێن نادەولەتی دا نینن، ڤێجا چەندە باش و دیمۆکراسی و مەدەنەژی بیت، جڤاکێ نێڤدەولەتی پالپشتا زۆرینەیا نەتەوەیی و وی لایەنییە کو دەولەت د دەست دایە، ل سوریایێ دەولەت د دەستێن کوردان دا نەبوو، لەوما ئەڤ رێککەڤتنا هێزێن سوریا دیمۆکرات و دەستهەلاتا نوو یا سوریایێ پێنگاڤەکا باشە ئەوژی؛ بۆ پاراستنا رۆژئاڤایێ کوردستانێ ژ هێرشەکا ژ نشکەکێڤە یا لەشکەرێ ترکیا، هەروەسا ژ سیاسەتا نە زەلال یا ئەمریکا بەرامبەر رۆژئاڤایێ کوردستانێ کو لسەر دەمێ دۆنالد ترەمپ ئەگەرەک ڤەکرییە، بدیتنا ترەمپ زیلینسکی کارتێن بهێز نەبووینە، ڤێجا رۆژئاڤایێ کوردستانێ هیچ پێگەهەکێ فەرمی ژی نەبوویە!
رەوشا جیۆپۆلیتیکی یا رۆژئاڤایێ کوردستانێ ژ باشوور و رۆژهەلات و باکوورێ کوردستانێ جۆدایە، لەوما هەبوونا جۆرەکێ فیدرالیزمێ، یان ئۆتۆنۆمی بێ پشتەڤانییا نێڤدەولەتی دا گەلەک بزەحمەت بیت، بتایبەت کو دەلیڤا روبرووبوونا هێزێن سوریا دیمۆکرات ل دژی دەستهەلاتا نوو یا سوریایێ ب نسبەت کوردان دا شەڕەکێ دوورایی بیت، د رەوشەکا وەهادا دوور نەبوو ئیسرائیل، یان ئیرانێ کورد خشاندبانە ناڤ شەڕەکێ تایفی کو دا زرارەکا مەزن ل کوردان دەت (هەولەکا وەسا هەبوو کو کورد و عەلەوی و درووز ل دژی دەستهەلاتا شەرع ئێک بگرن).
رۆژئاڤایێ کوردستانێ ئەگەر ئەڤ رێککەڤتنە نەکربا دڤییا چاڤەرێی هاریکارییا ئیسرائیل و ئەمریکا با کو ئەگەر هەبوو ل هەردەمەکی ئەو هاریکاری نەمابا، واتە ئێدی کورد ل رۆژئاڤایێ کوردستانێ ناهێنە گۆنەهبارکرن ب جۆداخواز و دارودەستەیێن ئیسرائیل و هێزێن هەرێمی.
هەر چەندە هێشتا زۆیە ئەڤ رێککەڤتنە بهێتە گەرەنتیکرن، لێ ئەگەر سەر بگریت دێ رۆژئاڤایێ کوردستانێ ژ وێ چەندێ رزگارکەت کو ترکیا، یان باخچەلی بێژیت:”هەسەدە بەشەکە ژ پەکەکە و پێدڤییە خوە هەلوەشینیت”. دیسا ئەڤ رێککەڤتنە بەرەڤ سیاسەتا ئەوروپا و ئەمریکا یە کو هەردەم داخواز کرییە کورد بشێن جهێ خوە دناڤ دەستهەلاتا نوو یا سوریا دا بکەن، هەرچەندە هێشتا دەستپێکە و نابیت گەلەک گەشبین بین، لێ مانا کوردان و خوە لادان ژ شەڕەکێ هەرێمی جۆرەکە ژ هونەرێ سیاسەتکرنێ، سەر بلند بیت خەباتا رۆژئاڤایێ کوردستانێ.