لەز، قامشلۆ
ئالدار خەلیل، ئەندامێ دەستەیا هەڤسەرۆکاتییا پارتییا یەکێتییا دیمۆکرات، د چاڤپێکەڤتنەکا تایبەت دا بۆ لەز میدیا گۆت:”پشتی کۆنفرانسەکێ پارتیێن کوردی دێ شاندێ کوردی بۆ دیمەشق پێکهێت”.
ئالدار خەلیل، دەربارەی دیالۆگا کوردی و کوردی، پەیوەندیێن کوردان دگەل وەلاتێ فەرەنسا، پرسا ئاشتییێ ل ترکیا و ئارمانجا کوردان د سوریا پاشەڕۆژێ دا، بەرسڤا پرسیارێن لەز میدیا دا.
ناڤبووری خوەیاکر:”دیالۆگا کوردی و کوردی دێ بۆ دیارکرنا داخوازیێن کوردان بیت د سوریا پاشەڕۆژێ دا و کانێ کوردان دێ چۆ داخوازی هەبن، دیالۆگا کوردی و کوردی دڤێت پارتیێن دەرڤەی (پەیەنەکە) و (ئەنەکەسە)دگەل شاندێ کوردی بچنە دیمەشق”.
ئەندامێ دەستەیا هەڤسەرۆکاتییا پارتییا یەکێتییا دیمۆکرات خوەیاکر:”نابیت ڤێ دەلیڤا دیرۆکی ژبەر ناکوکییێن حزبی ژ دەست بدەین و ئەو ئامادەنە دگەل هەموو پارتییێن کوردی روونن”.
دەربارەی پرسا تێکەلیێن کوردان و وەلاتێ فەرەنسا ئالدار گۆت:”تێکەلییێن مە ب هەموو ئاستان دگەل نوونەرێن فەرەنسییان هەنە، نوکە ژی بۆ پێكهاتنا ئیتیفاقا کوردان نوونەرێ فەرەنسا رولەکێ ئەرێنی هەیە و بەندەوارییا مە ژ فەرەنسا ئەوە پشتەڤانییا پرۆژێ دیمۆکرات یێ سوریا بکەت”.
دەربارەی پرۆسا ئاشتییێ ل ترکیا و کاریگەرییا ڤێ مژارێ لسەر رۆژئاڤایێ کوردستانێ ناڤبووری زەلالکر:”دەولەتا ترکیا گەهشتییە وێ باوەرێ شەڕ نە دبەرژەوەندیا وێ دایە، لێ نوکە مرۆڤ نەشێت حوکمی لسەر مژارا پرۆسا ئاشتیێ ل ترکیا بدەت”.
لدۆر ئارمانجێن کوردان د سوریا پاشەڕۆژێ دا، ئەرێ کورد دێ چۆ سیستەم بۆ سوریا و رۆژئاڤایێ کوردستانێ داخواز کەن؟ ئالدار دزانین:”کەسێن بارەکێ گران لسەر وان نینە درووشمێن مەزن دبێژن:”ئەم دێ دەولەتێ، یان فیدرالییێ بۆ رۆژئاڤا چێکەین” لێ ئەم ناخوازین سوریا پارچە ببیت، سوریا پارچەببیت ئەم کوردژی دێ لاواز بین، دڤێت ئەم هزر بکەین کو پێکهات و ئاینێن ل سوریا ب ئارامی بژین”.
ناڤبووری خوەیاکر:”ب هەبوونا سوریایەک خۆرت و دیمۆکرات دێ کێشا کوردی ژی خوەش هێتە چارەسەرکرن، دێ چەوا بەحسێ سوریایەک دیمۆکرات هێتە کرن کو ژن کۆلە بیت”.