لەز، تایبەت
دایکا گەریلا هارون، ب رێیا لەز میدیا بۆ رایا گشتی گۆت:”دەمێ من ڤیدیۆیا کۆڕێ خوە هارون دیتی کو کەتبوو دەستێ چەند خائینان و کەسەکی شەقەک ل هارونی دای دلێ من سۆت”.
مەدینە ئەلباك، دایکا گەریلا سەلیم ئەدیەمان بناسناڤ(هارون ئەلباك) پشتی روودانا ل گوندەکێ باژارێ شەرنەخ یێ باکوورێ کوردستانێ بۆ لەز هاتەزمان و گۆت:”من بەرخێ خوە نەدیت و کەتە دەستێ قۆرۆجییان، هارونێ من عەگیدە، ئەو ناترسیت، ئەو بۆ ئازادییا کوردستانێ چۆبوو سەر چیان، ژ نە چاری کەڤتییە دەستێ وان خائینان، لێ ئەز باش دزانم تۆلا کۆڕێ من ل ئەردی نامینیت”.
دایکا گەریلا هارون ب چاڤێن گری گۆت:”خوەزی ئەز شییابام دگەل بەرخێ خوە ئاخڤتبام، لێ ئەز نوکە سوپاسییا گەلێ دهۆک و هەموو کوردستانێ دکەم کو دگەل خەما مەنە”.
لدۆر هەمان روودان، برایێ هارون مەمەد ئەدیەمان بۆ لەز گۆت:”سالا ۲٠۱٤ ـ ێ، هارون ببوو گەریلا، ۹ سال بوون، مە چۆ زانیاری ژ وی نەدزانین، هەتا ئەو رۆژا مە ڤیدیۆیا وی دیتی کو کەڤتبوو دەستێن گرۆپەکێ خائین”.
ناڤبۆری دازانین:”نوکە، هارون د زیندانێن دەولەتێ دایە، و ئەو نزانن چارەنڤیسێ وی دێ چۆبیت”.
دەربارەی ئەو گرۆپێ جاشان یێ هارون گرتی و رادەستی جەندۆرمێن ترک کری، مەمەد خوەیاکر:”وان کەسان خوە ڤەشارتییە، لێ ئەگەر چۆ کەس و هێز ژی تۆلا هارونی ڤەنەکەن، ئەز تۆلا برایێ خوە ل ئەردی ناهێلم”.
هارون ئەلباک، ٥ برا و ۳ خویشک هەنە، ژ خێزانەکا هەژار یا دەڤەرا ئەلباک یا باژارێ وانێ یە، رۆژا ۲۷ ئادارا ئەڤ سالە، پشتی ئۆپەراسیۆنەکا لەشکەرێن ترکیا رێیا وی ژ هەڤالێن وی هاتبوو بڕین و کەتبوو کەمینا گرۆپەکێ (قۆرۆجییان) ئانکو جاشان کو ٥ جاش بوون، و ئێکسەر هارون رادەستی جەندۆرمەیێن ترک کربوو.
پشتی وێ روودانێ هێزێن پاراستنا گەل (هەپەگە) داخوەیانی بەلاڤکر و گۆت:”ئەو دێ ب دژواری تۆلا گەریلا هارون ڤەکەن”.