له‌ز، دهۆك
رێكخراوا هيڤى ب پشته‌ڤانييا راسته‌وخوه يا نێچيرڤان بارزانى سه‌رۆكێ هه‌رێما كوردستانێ، تيمه‌كێ پزيشكێن وه‌لاتێ ئيتالييا هينايه دهۆك و دێ 10-12 نه‌شته‌رگه‌ريێن مه‌زن يێن دلى بۆ زاڕۆيان ئه‌نجام ده‌ن.
لدووڤ ئه‌و زانيارييێن رێكخراوا هيڤى داينه له‌ز ميديا:”دناڤه‌به‌را رۆژێن 7-12 ڤێ هه‌يڤێ، تيمه‌كێ 13 كه‌سى يێ ئيتالى نوكه ل پارێزگه‌ها دهۆك – ن و ژبلى 10-12 نه‌شته‌رگه‌رييێن دلى بۆ زاڕۆيان نێزيكى 200 پشكنينان ژى دێ ئه‌نجام ده‌ن.
دكتۆر محه‌مه‌د مه‌حمود، نوونه‌رێ رێكخراوا هيڤى بۆ له‌ز ميديا گۆت:”ئه‌ڤ تيمێ ئيتالى دێ چه‌ندين زاڕۆيان ده‌ستنيشان كه‌ت كو نه‌خوه‌شيێن گران هه‌بن و دێ به‌نه ئيتاليا چاره‌سه‌رييا وان كه‌ن”.
ناڤبوورى گۆتژى:”تيمێ ئيتالى دێ هه‌لسه‌نگاندنه‌كا تايبه‌ت ل نه‌خوه‌شخانه‌يێن ژنان و زاڕۆكبوونێ ئه‌نجامده‌ن كو پزيشكێن تايبه‌تمه‌ند دێ پشكينان بۆ ژنێن دووگيان و زاڕۆيێن وان كه‌ن”.
ژ پڕۆژه‌يێن ڤى تيمى بۆ پارێزگه‌ها دهۆك:
- راهێنانا ب ژماره‌كا كارمه‌ندێن ناڤخوه بكه ت ئه‌وژى بۆ بلندكرنا شيانێن وان يێن نه‌شته‌رگه‌ريێن دلى بۆ زاڕۆيان.
- دياركرنا چه‌ند كارمه‌ندان بۆ ئاماده‌بوون ل راهێنانێن تايبه‌ت ل باژارێ ميلانو يێ ئيتاليا.
تيمێ ئيتالى كو ژنه‌خوه‌شخانه‌يا سان دوناتۆ(I.R.C.C.S Policlinco San Donato و رێكخراوا Bambini Cardiopatici Nel Mondo Association پێكهاتييه دێ بهه‌ماهه‌نگييا دگه‌ل وه‌زاره‌تا ساخله‌مييا حكومه‌تا هه‌رێما كوردستانێ دگه‌ل رێڤه‌به‌رييا گشتى يا ساخله‌مييا پارێزگه‌ها دهۆك و سه‌نته‌رێ ئازادى بۆ نه‌خوه‌شيێن دلى دێ كارێن خوه ئه‌نجامده‌ن.