له‌ز، دهۆك
نوونه‌را پارتییا دیمۆكراتا گه‌لان (هه‌ده‌په) ل هه‌ولێر، لدۆر سزایێن تركیا لسه‌ر باله‌فڕگه‌ها سلێمانیێ راگه‌هاند: ده‌وله‌تا تركیا یا هه‌ولده‌ت ب رێیا سزایێن سه‌ر باله‌فڕگه‌ها سلێمانیێ تۆلێن خوه ل بافل تاله‌بانی ڤه‌كه‌ت و هه‌مووو كوردان سزا بده‌ت.
رۆژا 3-ێ نیسانا 2023-ێ، كۆمپانییا تۆركش ئێرلاین، هه‌مى گه‌شتێن خوه بۆ باله‌فڕگه‌ها سلێمانیێ راگرتن.
لدۆر هه‌مان پرس، تانژۆ بیلگیچ، به‌رده‌ڤكێ وه‌زاره‌تا ده‌رڤه یا تركیا، رۆژا 5-ێ نیسانا 2023-ێ، گۆت:”ژ رۆژا 3-ێ نیسانێ هه‌تا 3 ته‌مۆزا ئه‌ڤ ساله، ئاسمانێ تركیا بۆ وان هه‌موو باله‌فڕان دێ یێ گرتی بیت یێن كو دچن باله‌فڕگه‌ها سلمێنایێ، چنكو چالاكیێن په‌كه‌كێ ل وێ باله‌فڕگه‌هێ زێده‌بووینه”.
ده‌رباره‌ی ڤێ مژارێ ناهیده ئه‌رمش، نوونه‌را هه‌ده‌پێ ل هه‌ولێر، تایبه‌ت بۆ له‌ز میدیا گۆت:”ده‌وله‌تا تركیا ڤێ دووماهیێ گه‌له‌ك ژ هه‌ولێن بافل تاله‌بانی نه‌رازییه كو بافل تاله‌بانی سه‌ره‌دانا رۆژئاڤایێ كوردستانێ كربوو و گۆتاره‌ك ژی بۆ ئاهه‌نگا نه‌ورۆزا ئامه‌دێ پێشكێش كربوو و هه‌ول بۆ نێزیكبوون و ئێكگرتنا كوردان هه‌بوون، له‌وما ده‌وله‌تا تركیا ڤییا ب سزادانا بالفه‌ڕگه‌ها سلێمانیێ تۆلێن خوه ل بافل تاله‌بانی ڤه‌كه‌ت”.
ئه‌رمه‌ش زه‌لالكر:”وه‌ك هه‌ده‌په مه هه‌ولێن بافل تاله‌بانی بۆ ئێكرێزییا كوردان پیرۆز دیتن، لێ ده‌وله‌تا ترك دژی هه‌موو كوردانه و ئه‌و هه‌ولێن بافل تاله‌بانی سه‌رۆكێ ئێكه‌تی نیشتیمانی كوردستان بۆ خوه ب مه‌ترسی زانین و نوكه ب دژایه‌تییا سلمانیێ شه‌ڕێ هه‌موو كوردان دكه‌ت”.
ژبلی گه‌شتێن باله‌فڕگه‌هـ و هێلێن تركیا، هه‌موو باله‌فڕێن ئه‌سمانێ تركیا بكاردهینن ژبه‌ر سزایێن تركیا نه‌شێن گه‌شتان بۆ باله‌فڕگه‌ها سلێمانیێ ئه‌نجام بده‌ن.