له‌ز، دهۆك
ئه‌ندامه‌كا په‌رله‌مانێ كوردستانێ راگه‌هاند: خۆلا نوكه یا په‌رله‌مانێ كوردستانێ، چۆ پرۆژه قانوون نه‌بووینه و نابن كو به‌حسێ قه‌ره‌بۆكرنا قۆربانیێن هێرێشن تركیا بكه‌ت.
لدووڤ ئامارێن رێكخراوا (سى پی تی) ل هه‌رێما كوردستانێ”ژ مه‌ها ته‌باخا سالا 2015-ێ، هه‌تا ده‌ستپێكا ئه‌ڤ ساله، 309 كه‌س ژبه‌ر هێرشێن تركیا بووینه قۆربانی كو پترییا وان ل پارێزگه‌ها دهۆك بوون”.
سه‌وسه‌ن محه‌مه‌د میرخان، سه‌رۆكا لیژنا كاروبارێن شه‌هیدان و جینۆساید و زیندانیێن سیاسی ل په‌رله‌مانێ كوردستانێ، بۆ له‌ز گۆت:”خۆلا پێنجێ یا په‌رله‌مانێ كوردستانێ، بۆ قه‌ره‌بووكرنا كه‌سوكارێن شه‌هیدان و بریندارێن هێرشێن تركیا چۆ پرۆژه قانوون ل په‌رله‌مانێ كوردستانێ نه‌بوون و نوكه ژی چۆ پرۆژی ل به‌ر ده‌ست نینن”.
ناڤبووریێ گۆتژی:”گهلهك داخوازی و پێشنیازێن وه‌لاتیێن كو ژبه‌ر هێرشێن تركیا زرار ڤێكه‌تی، گه‌هشتینه په‌رله‌مانی، لێ هه‌تا نوكه چۆ په‌رله‌مانتاران پرۆژه پێشنیاز بۆ قه‌ره‌بوویا ڤان زرار ڤێكه‌ڤتییان نه‌بووینه”.
ده‌رباره‌ی هه‌مان مژار، كامه‌ران ئۆسمان، نوونه‌رێ رێكخراوا (سی پی تی) ل هه‌رێما كوردستانێ بۆ له‌ز میدیا خوه‌یاكر:” ژ هه‌یڤا ته‌باخا سالا 2015-ێ، هه‌تا ده‌ستپێكا ئه‌ڤ ساله، ژبه‌ر هێرشێن له‌شكه‌ری یێن تركیا، 129 سڤیل و فه‌رمانبه‌ر و هێزێن ئه‌منی یێن هه‌رێما كوردستانێ شه‌هيدبووینه و 180 كه‌سێن دی ژی برینداربووینه”.
نوونه‌رێ( سی پی تی) زه‌لالكر:”حكومه‌تا ئیراقێ ژی خوه ل ڤان قۆربانیان نه‌كرییه خۆدان و ب چۆ ره‌نگان سه‌ره‌ده‌ری دگه‌ل كه‌سوكارێن قۆربانیین هێرشێن تركیا نه‌كریه”.
هه‌ر ژ سالا 1983-ێ، هه‌تا نوكه، له‌شكه‌رێ تركیا ب به‌هانه‌یا شه‌ڕێ دژی گه‌ریلاێن پارتییا كاركه‌رێن كوردستان (په‌كه‌كه) به‌رده‌وام هێرش دكه‌ته سه‌ر ده‌ڤه‌رێن سنووری یێن پارێزگه‌هێن دهۆك و هه‌ولێر و گهلهك ده‌ڤه‌رێن دی یێن باشوورێ كوردستانێ.