له‌ز، دهۆك
رۆژا 10-ێ حۆزه‌يرانا 2019-ێ، نێچيرڤان بارزانى بۆ دووه‌م سه‌رۆكێ هه‌رێما كوردستانێ، ب ئاماده‌بوونا 1200 مێهڤانان لسه‌ر ئاستێ هه‌رێما كوردستانێ و ئيراقێ و جيهانێ سوندا ياسايى خوار.
نێچيرڤان بارزانى و سياسه‌تا ناڤخوه‌يى
نێچيرڤان بارزانى، د گۆتارا سوندخواردنێ دا گۆتبوو:”لسه‌ر ئاستێ ناڤخوه يا هه‌رێما كوردستانێ، گه‌له‌ك جاران ئه‌م د فه‌رهه‌نگا سياسى و نه‌ريتێ خوه يێ ميديايى دا، زێده‌تر ژ پێدڤى ته‌‌كه‌زێ لسه‌ر ململانێ و لهه‌ڤنه‌كرنێ و سازنه‌كرنێ دكه‌ين، ژنوكه وێڤه ل گشت ئاستێن جڤاكى و سياسى دگه‌ل ئێك ته‌با و ساز بين، من پێوه نينه كو ئه‌ڤه داخوازييه‌ك بيت ژ شيانان ڤه‌ده‌ر بيت”.
دناڤ سه‌ركرده‌يێن هه‌رێما كوردستان دا، نێچيرڤان بارزانى ب سه‌ركرده‌يێ هه‌ره نزيك ژ پارت و لايه‌نێن دى يێن هه‌رێما كوردستانێ دهێته ناسكرن، چنكو نێچيرڤان بارزانى زێده‌تر وه‌ك سه‌رۆكێ هه‌رێمێ ده‌ستهه‌لاتێن خوه ب يه‌كسانى و بێلايه‌ن بكارهيناينه.
نێچيرڤان بارزانى و به‌غدا
سه‌رۆكێ هه‌رێما كوردستانێ، هه‌ول دايه د شه‌ش سالێن سه‌رۆكايه‌تييا هه‌رێمێ دا سياسه‌تا سفر كێشه دگه‌ل به‌غدا بكاربهينيت وهه‌مان سياسه‌ت بكاربهينيت ده‌ما دگۆتارا خوه يا سوندخواردنێ دا گۆتى:”دڤێت دگه‌ل حكومه‌تا فيدرالى ل به‌غدا بۆ چاره‌سه‌رييێن هه‌ڤپشك كار بكه‌ين ئه‌وژى د چوارچووڤێ ده‌ستوورێ فيدرالي ئيراقێ دا، ئه‌و دستوورێ چه‌نده‌ها سالان مه خه‌ون پێڤه ديتين”. پشتى ناكۆكييێن ريفراندۆما سه‌ربخوه‌ييا هه‌رێما كوردستانێ، بارزانى ئێكه‌م كه‌س بوو كو شيايى ناكۆكييێن هێزێن ئيراقى و شيعه دگه‌ل كوردان و هه‌رێما كوردستان كێم كه‌ت و ژبه‌ر پێگه‌هێ بهێزێ بارزانى لسه‌ر ئاستێ هه‌رێما كوردستانێ پترييا پارتييێن ئيراقى باوه‌رى دانه سياسه‌تا سه‌رۆكێ هه‌رێما كوردستانێ.
بارزانى و ته‌هران
ئه‌و ده‌مێ ته‌هران موشه‌كێن باليستى ئاراسته‌ى هه‌ولێر دكرن و گۆنه‌ها په‌يوه‌نديێن ئيسرائيل و هه‌ولێر ئاراسته‌ى هه‌رێما كوردستانێ دكر، نێچيرڤان بارزانى، رۆژا 5-ێ ئايارا 2024-ێ، گه‌هشته ته‌هران و رۆژا 6-ێ ئايارێ دگه‌ل عه‌لى خامه‌نائى رابه‌رێ بلندێ ئيرانێ كۆمبوو و ب ديبلۆماسى وهێزا نه‌رم شييا داوييێ ل مووشه‌كێن ئيرانێ بينيت، هه‌ڤده‌م ئالۆزيێن ناڤه‌به‌را پارتيێن كورد يێن رۆژهه‌لاتێ كوردستان و ئيرانێ لسه‌ر سنوورێن باشوورێ كوردستانێ كێمتر لێكرن.
نێچيرڤان بارزانى و پاريس
سه‌رده‌مێ سه‌رۆكايه‌تييا نێچيرڤان بارزانى، سه‌رۆكێ فه‌رنسا ئيمانوێل ماكرۆن 7 جاران دگه‌ل بارزانى كۆمبوويه بۆ هه‌ر گۆهه‌ڕتنه‌كا رۆژهه‌لاتا ناڤه‌راست ماكرۆن و فه‌ره‌نسا پشتبه‌ستنه‌كا ته‌مام لسه‌ر ديتن و بۆچوونێن سه‌رۆكێ هه‌رێما كوردستانێ دكه‌ت و كۆچا ئيليزێ وه‌ك دووه‌م مالا كوردان لێهاتييه.
لسه‌ر ئاستێ ئێكه‌تييا ئه‌وروپا ووه‌لاتێن كه‌نداڤى و ئاسيا و ئه‌مريكا، نێچيرڤان بارزانى، پتر ژ هه‌ر سه‌ركرده‌كێ دى يێ هه‌رێما كوردستانێ په‌يوه‌ندى و كاريگه‌رى لسه‌ر رايا گشتى يا به‌رامبه‌ر كێشه‌يا كوردى بره‌نگه‌كێ ئه‌رێنى درووستكريه.
سه‌رۆك نێچيرڤان و سه‌رۆك ئۆجه‌لان
تركيا به‌رى پڕۆسه‌يا ئاشتييێ و هه‌ڤديتێن دگه‌ل عه‌بدوللا ئۆجه‌لان بۆ رايا گشتى راگه‌هينيت، نێچيرڤان بارزانى بفه‌رمى داخوازكره ئه‌نقه‌ره و رۆژا 16-ێ ئۆكتۆبه‌را 2024، دگه‌ل ره‌جه‌ب ته‌يب ئه‌ردۆگان كۆمبوو.
تركيا بۆ سه‌رخستنا پرۆسه‌يا ئاشتييێ پشته‌بستنه‌كا مه‌زن لسه‌ر هاريكارييێن نێچيرڤان بارزانى كرينه، چنكو ده‌رباره‌ى ڤێ پرۆسه‌يێ نێچيرڤان بارزانى پێشوازى ل ئه‌نجامێ كۆنگرێ 12-ێ يێ پارتيا كاركه‌رێن كوردستان په‌كه‌كه كر و راگه‌هاند:”وه‌ك هه‌رێما كوردستانێ بۆ سه‌ر خستنا پرۆسا ئاشتييێ دناڤبه‌را تركيا و په‌كه‌كه دا چى ژ ده‌ستێن وان بهێت دێ هاريكاربين”.
نێچيرڤان بارزانى، ب زمانه‌كێ ڤه‌كرى و رێزڤه ل ده‌مێ به‌حسكرنا عه‌بدوللا ئۆجه‌لان دبێژيت:”سه‌رۆك ئۆجه‌لان” ڤێ په‌ياما نێچيرڤان بارزانى، ئه‌و به‌ربه‌ستێن دژوار يێن ناڤبه‌را گه‌له‌ك ژ كادرولايه‌نگرێن په‌كه‌كه و پارتى شكاندن و گيانێ لێبوورينێ و رێزگرتنا كوردان بهێزتر لێكرييه.
بارزانى و رۆژئاڤا
د گەرمە گەرما هێرشێن ترکیادا بۆ سەر سەرێکانی و گرێسپی، سێرگی لاڤرۆڤ، وەزیرێ دەرڤە یێ رووسیا، رۆژا 7 ێ چڕیا دووێ 2019ـ ێ، سەرەدانا هەولێر کر، نێچیرڤان بارزانی داخواز ژ لاڤرۆڤ کربوو:”کار بۆ راگرتنا هێرشێن ترکیا بکەت و کێشا کوردان چارە کەت”. لاڤرۆڤ ئەڤ بەهانە هەبوو :”کورد ل سوریایێ گەلەک تەرەفن و بۆ مە زەحمەتە دگەل کوردان باخڤین”.
هه‌ڤده‌م دگه‌ل سەرەدانا لاڤرۆڤ ب رۆژەکێ، مەزلۆم کۆبانی، فه‌رمانده‌يێ گشتى يێ هێزێن سوريا ديمۆكرات گەهشتبوو هەولێر و دگەل نێچیرڤان بارزانی، کۆمبوو و نێچیرڤان داخواز ژ مەزلۆم کربوو:”دیالۆگا کوردان دەستپێبکەن” مەزلۆم کۆبانی، پشوازی ل پێشنیازا نێچیرڤان بارزانى کربوو، لێ داخواز ژ بارزانى کربوو :”گڤاشتنێ بێخیتە سەر (ئەنەکەسێ) کو بهێتە دیالۆگێ” و پشكه‌ك ژ سه‌ركه‌ڤتنا كۆنگرێ كوردان ل رۆژئاڤايێ كوردستانێ ژ ئه‌نجامێ هه‌ولێن سه‌رۆكێ هه‌رێما كوردستانێ بوون.
