له‌ز، دهۆك
ئه‌ندامه‌كێ سه‌ركردایه‌تییا ئێكه‌تی نیشتیمانی كوردستان راگه‌هاند: ئێكه‌تی و پارتی لدۆر ئه‌نجامدانا هه‌لبژاردنێن هه‌رێما كوردستانێ رێككه‌ڤتینه بتنێ كێشه‌یا كورسیێن پێكهاته‌یان ماینه و ل هیڤییا پێشنیازه‌كا نه‌ته‌وه‌یێن ئێكگرتی نه.
له‌تیف نێروه‌یی، ئه‌ندامێ سه‌ركردایه‌تیيا ئێكه‌تی بۆ له‌ز میدیا گۆت:”بۆ هه‌لبژاردنێن 18-ێ چڕیا دووێ 2023، پارتی و ئێكه‌تی لسه‌ر گه‌له‌ك خالێن سه‌ره‌كی رێككه‌ڤتینه وه‌ك سیسته‌مێ 50% ڤه‌كری و 50% گرتی، و سیسته‌مێ چوار بازنه ل هه‌رێما كوردستانێ”.
ده‌رباره‌ی كێشه‌یا كورسیێن پێكهاته‌یان نێروه‌یی خوه‌یاكر:”هه‌تا نووكه ئه‌و كێشه نه‌هاتییه چاره‌سه‌ركرن” لێ یۆنامی، ل ئیراقێ بۆ چاره‌سه‌ركرنا ڤێ كێشێ دێ پێشنیازه‌كێ پێشكێشی پارتی و ئێكه‌تی كه‌ت و ره‌نگه ئه‌و پێشنیاز كێشه‌یا كورسیێن پێكهاته‌یان ژی چاره‌سه‌ركه‌ت”.
لدۆر راستڤه‌كرنا قانوونا هه‌لبژاردنان، ڤی سه‌ركردێ ئێكه‌تی زه‌لالكر:”لسه‌ر راستڤه‌كرنا هه‌لبژاردنان ئه‌و دگه‌ل پارتی رێككه‌ڤتینه كو پێدڤییه ئه‌و قانوون به‌ری هه‌لبژاردنان بهێته راستڤه‌كرن”.
بڕیاربوو هه‌لبژاردنێن په‌رله‌مانێ كوردستانێ بۆ خۆلا شه‌شێ رۆژا ئێكێ چڕیا ئێكێ 2022، بهێنه ئه‌نجامدان، لێ ژبه‌ر ناكۆكیێن ناڤبه‌را پارتییان، هه‌لبژاردن هاتنه پاشخستن و نێچیرڤان بارزانی سه‌رۆكێ هه‌رێما كوردستانێ رۆژا 18-ێ چڕیا دووێ 2023 بۆ هه‌لبژاردنان دیاركر.