لەز، مەروان داود
قایماقامێ نوویێ شنگال، بۆ لەز میدیا راگەهاند: ئەز ئێکەم کەسێ سەربخوەمە کو دبمە قایمقامێ قەزا شنگال.
ئەڤرۆ سێشەمبی ۲ـ ێ تەمۆزا ۲٠۲٤، ب پترییا دەنگێن ئەندامێن جڤاتا پارێزگەها نەینەوا، 14 پۆستێن کارگیری یێن دەڤەرێن جۆدایێن وێ پارێزگەهێ هاتنە گۆهەڕتن و سەیدۆ خەیری، وەک قایمقامێ شنگال دیارکرن.
دەربارەی ڤێ مژارێ، سەیدۆ خەیری، بۆ لەز میدیا گۆت:”ژبلی فراکسیۆنا پارتی دیمۆکراتی کوردستان و (نەینەوا لی ئەهلیها) کو ئامادەی کۆمبوونێ نەبوون، فراکسیۆنێن دی دەنگ دان و ئەز وەک کەسەکێ سەربخوە کرمە قایمقامێ شنگال “.
سەیدۆ گۆتژی:”ئێک ژ مەرجێن ئەندامێن جڤاتا پارێزگەها نەینەوا ئەوبوو؛ ئەو کەسێ دبیتە قایمقامێ شنگال پێدڤییە سەربخوە بیت، لەوما ئەز هەلبژاردم و ئەو نووچە نەراستن یێن دبێژن (سەیدۆ خەیری نێزیکی حەشدا شەعبی و پەکەکێ یە) “.
سەیدۆ خەیری، وەلاتیێ شنگالە، پێشتر وەک کەسەکێ سەربخوە خوە ناساندبوو، هەلگرێ بڕوانامەیا بەکالۆریۆس ـ ە، ئێکەتی نیشتیمانی کوردستان و پارتیێن نێزیک پەکەکێ ل شنگال، هیچ رەدکرنەک لسەر هەلبژاردنا وی وەک قایمقام نەبوویە.
شنگالا ئێزدی نشین، پشتی هێڕشێن دەولەتا ئیسلامی ل ئیراق و شامێ (داعش) ژ سالا ۲٠۱٤، هەتا نوکە ئێک ژ دەڤەرێن پڕ هەڤڕکیێن سیاسی و لەشکەری یێن پارێزگەها نەینەوایە و بەردەوام پارتی دیمۆکراتی کورستان و ئێکەتی نیشتیمانی کوردستان و پارتیێن ئێزدییان یێن نێزیکی فەلسەفا پەکەکێ هەولددەن ل ڤێ دەڤەرێ ببنە هێزا ئێکەم یا لەشکەری و کارگێری وحزبی.