گۆتار، دارا عەبدوللا
سالا ۱۹۹۸، ئۆجەلان د چاڤپێکەڤتنەکێ دا دبێژیت:”ئەگەر دگەل مە دانیشن و دانوستاندنان بکەین، دێ چەکان دانین”. پشتی ۲۷ سالان، ئەڤرۆ بڕیارا دانانا چەکان و هەلوەشاندنا پەکەکێ دا.
دیتنێن لسەر پەیاما ئۆجەلان سەیرو سەمەرەن.
بۆ نموونە دبێژن؛ ئۆجەلان هاژخوە نینە، یان کەسەک زیندانی بیت و لژێر ئەشکەنجێ هیچ تشتەک ژێ ناهێتە وەرگرتن. ئەوێن وان گۆتنان دبێژن وەسا دیارە نە ئاگەهـ ژ ژیانا ئۆجەلانە نە پەکەکە. پترییا کتێبێن ئۆجەلان ل زیندانێ هاتینە نڤێشین ژ وان ژی گرنگترین کتێب.
ئەو کتێبێن سیستەمێ رۆژئاڤایێ کوردستانێ لسەر هاتییە ئاڤاکرن، ل زیندانێ هاتینە نڤێسین. ئەو کتێبێن هزرا پەکەکێ نووکرین ل زیندانێ هاتینە نڤێسین. ئۆجەلان ل زیندانێ کتێبێن بۆکچین دخوینیت، لژێر کاریگەرییا بۆکچین کو ئۆجەلان خوە ب قوتابییێ وی دزانیت، هزرا پەکەکێ ژ مارکسی لینینی گۆهەرت بۆ دیمۆکراتیکا کۆنفیدرالیسم کو نوکە رۆژئاڤایێ کوردستانێ وەک سیستەمەکێ کێم وێنە، جێبەجێ دکەت.
ئەڤ پەیامە ل ئاستەکێ گەلەک بلند یێ هۆشیاری و زانستی نڤیسییە. ئەوێن کو دبێژن ئۆجەلان هاژخوە نینە، ئەز دوێ باوەرێ دامە کو دبەشەکێ وان زاراڤان ناگەهن یێن کو د پەیامێ دا هاتینە و دبیت هەموو ژی نەشێن پەیامەکا وەسا بنڤیسن. پەیام ب دەست و خەتێ خوە نڤێسییە ئەوژی ب ئاگەهدارییا کەسێن گەلەک نێزیکی خوە و ئەندامێ دەم پارتی، لەوما هیچ گۆمانەک ژی نینە کو بێژیت ئۆجەلان ئەو نامە نەنڤێسییە.
پاشی دێ بێژن؛ ئەڤە ئاشبەتالە، چەوا چێدبیت ئەڤە ئاشبەتال بیت کو بڕیارەک دقۆناغا هەرە بهێزبوونێ دا هاتییە دان. ئاشبەتال ل دەمێ شکەستن و بێ شیانان دا دهێتە راگەهاندن، لێ پەکەکە نوکە هەم ل ترکیا هەم ل سووریا هەم رێکخستنێن وێ ل ئەورۆپا د قۆناغا هەری بهێزبوونا خوەدانە و شیانێن لەشکەری و سیاسی یێن بلند هەنە. ڤان هەلبژاردنێن داوییێ یێن ئەلمانیا چەندین ئەندام پەرلەمانێن کورد دەرچوون کو پترییا وان ل پەکەکێ نێزیکن.
دەمێ ڤێ بڕیارێ گەلەک یێ درووستە، رژێما زایۆنی هەموو شیانێن خوە بۆتێکدانا دەڤەرێ بکاردهینیت، بتایبەتی بکارهینانا دۆزا کوردان بۆ مەرەمێن خوە یێن چەپەل، کورد بۆ رژێما زایۆنی هیچ نینە، ژبلی بەردەستکەکی بۆ گەهشتن ب ئارمانجێن خوە و هەردەمێ بڤێت دێ هاڤێژیت.
سەرکردایەتییا سیاسی یا کورد ل ترکیا و سوریا گەلەک ب باشی تێگەهشت، لەوما نەکەڤتنە داڤێن رژێما زایۆنی. ل ڤان داوییان رژێما زایۆنی هەولێن تەواوێن خوە داینە داکو رەوشا کوردان ل سوریا بکاربهینیت، لێ شکەستن هینا و نوکە مژوولی رێککەڤتنا دگەل درۆزێن باشوورێ سووریانە.
ئەڤ رەوشا نەخواستی ل دەڤەرێ و رەوشا ناڤخوە یا ترکیا نە د بەرژەوەندییا ئاک پارتی دایە و دێ بیتە ئەگەر کو سەرکردایەتییا سیاسی یا ترکیا ناچار بکەت د دستوورێ ترکیا دا دانپێدانێ ب پشکەکا مافێن کوردان بکەت، ئەردۆگان دێ شێت بۆ جارا سیێ ببیتە سەرۆک کۆمارێ ترکیا هەلبژێریت، ئەڤەژی بێ پشتەڤانییا کوردان موستەحیلە.
ژبلی ڤێ ژی، دەولەت باخچەلی، کو ئۆجەلان راستەوخوە ناڤێ وی د پەیاما خوەدا هینایە کو ب رەنگەکێ نەچاڤەرێکری، بۆ چارەسەرکرنا دۆزا کوردی هاتییە پێش. دەولەت باخچەلی دناڤ نەژادپەرستێن ترکیا دا پێگەهەک و رێزەکا تایبەت هەیە، دانپێدانا وی ب ڤ پرسێ دێ دۆزا کورد ب رەنگەکێ ئێکجار گرنگ بەتە پێش.
هەبوونا پەکەکێ ل سالێن دەربازبوویی، نە بتنێ ئەگەرێ باشنەکرنا رەوشا کوردان بوو، بەلکو بوویە ئەگەرێ بهێزبوونا دەولەتا ترکیا، ژ بەر شەڕێ پەکەکێ ل چەند سالێن دەربازبوویی، وەبەرهێنانەکا ئێکجار مەزن د بوارێ لەشکەری دا کرییە و گەلەک داهێنان ژی کرینە. درووستکرنا درۆنێن بەیرەکتار ژ ئەنجامێ شەڕێ دژی پەکەکێ بوو. ترکیا درۆن ژ ئیسرائیل دکڕین بۆ هێرشکرنا سەر کوردان، ژ نشکەکێ ڤە پەیوەندییێن ناڤبەرا وان تێکچوون، ترکیا ناچاربوو وێ بخوە دەست ب وەبەرهێنانێ کر و ئەڤە بۆ ئەگەرێ درووستکرنا کۆمەکا تەکنۆلۆژیایان کۆ بۆ ژینگەها شەڕێ قەندیل گۆنجاینە، لسەرئاستێ نێڤدەولەتی ژی کاریگەریا خوەیا تایبەت دێ هەبیت، سالێن دەربازبوویی ئەلمانان چەک ددانە ترکیا، دووبارە تێکچوونا پەیوەندیان دگەل ئەلمانیا بۆیە ئەگەر کو ترکیا وەبەرهێنانێ د تانک و دژە تانکان دا بکەت، هەمی بۆ لێدان ل پەکەکێ. ئەڤە هەمی بوونە ئامرازەک بۆ گەشەکرنا لەشکەرێ ترکیا و پێدانا شەرعیەتێ ب دەولەتا ترکیا دا زێدەتر وەبەرهێنانێ د شیانێن خوە یێن لەشکەری دا بکەت.
پەکەکە بۆ سەردەمەکی، وەک ئۆجەلان بەحس دکەت، کاریگەرییەکا خوە یا گرنگ هەبوو، بەلێ نوکە د ڤی سەردەمێ تەکنۆلۆژیێ دا گەلەک ب زەحمەتە رووبرووی دەولەتێ ببی، هەوەسا رەوشەکا وەسا چێبوویە کو خەباتا سیاسی بۆ کوردان گەلەک گرنگتر بیت، ژ خەباتا چەکداری. دبیت ئۆجەلان هزرەکا سیاسی یا نوو هەبیت کو ب هەمان رەنگ کاریگەرییەکا ئەرێنی دانیتە وسەر دۆزا کوردان.
ل داوییێ دنانا چەکان ژ لایێ پەکەکێ وەسا ب سادەیی نابیت، گەلەک دەم و کۆمەکا رێکار و رێککەڤتنێن ئاشکرا و ژێربژێر دڤێن. ل داوییێ ئەڤە سیاسەتە، رەنگە تووشی شکەستنێ ببیت، یان سەرکەڤتی بیت، لی نوکە ئەم ئەڤێ دزانین کو پرۆسا ئاشتییێ گەلەک د بەرژەوەندیا کوردان و ترکان و دەڤەرێ دایە.