ئه‌رسه‌لان عه‌بدولره‌حمان
رۆژنامه‌ڤانی، پیشه‌یه، ئه‌ركه، به‌رپرسیاره‌تییه، لدووڤ قانوونێن رۆژنامه‌ڤانی ل كوردستانێ، ل ده‌مێ جێبه‌جێكرنا ئه‌ركێ خوه، رۆژنامه‌ڤانی هه‌مان مافێن فه‌رمانبه‌رێ گشتی هه‌نه.
رۆژنامه‌ڤان نوونه‌راتیا به‌رژه‌وه‌ندیێن گشتی یێن جڤاكی دكه‌ت، د خه‌ما گشتی دایه. كار دكه‌ت كو واقعی وه‌ك هه‌یی نیشان بده‌ت، چۆ ده‌مان واقعی تێكناده‌ت، راستییان ناگۆهه‌ڕیت به‌لكو نیشان دده‌ت، رۆژنامه‌ڤان كاردكه‌ت دا ببیته خوه‌دیكا واقعی و هۆشیاریێ به‌لاڤ دكه‌ت.
خه‌ما مه‌زن یا رۆژنامه‌ڤانی ئه‌وه شاشییان نیشان بده‌ت، د بیته پره‌ك بۆ گه‌هاندنا داخوازی و سكالایێن وه‌لاتیان یێن ده‌ربا‌ره‌ی ره‌وشا ژیانا وان یا رۆژانه و داهاتی بۆ ده‌ستهه‌لاتێ، د هه‌مان ده‌مدا كار بۆ وێ چه‌ندێ دكه‌ت به‌رسڤا داخوازیێن خه‌لكێ ژ ده‌ستهه‌لاتێ وه‌رگریت. خه‌ما وی یا رۆژانه هۆشیاركرنا جڤاكییه، حه‌زدكه‌ت دیارده‌یێن خراب نه‌هێلیت، كار بۆ وێ چه‌ندێ دكه‌ت به‌هایێن ئینسانی و ژینگه‌هـ دۆستیێ و نیشتیمانی جهێ كولتوورێن پاشكه‌ڤتی بگرن.
ئه‌ڤه و زێده‌تر ده‌ربا‌ره‌ی رۆژنامه‌ڤانیا راسته‌قینه دهێنه گۆتن، هێشتا زێده‌تر ژی مایه، بتایبه‌ت كو رۆژنامه‌ڤان خۆدان كه‌سایه‌تییه‌كا گران و به‌هاداره. پیشه‌یێ خوه خوه‌ش دڤێت، خوه نزمتر ژ چۆ پله‌كا حزبی و ئیداری نابینیت. چاڤدێره‌كێ راسته‌قینه یه لسه‌ر ده‌ستهه‌لاتا سیاسی و ئیداری. د چوارچووڤێ قانونێ دا كاردكه‌ت. ب بنه‌مایێن قانوونی و مافێن مرۆڤان و پاراستنا ژینگه‌هێ پێگیره، هه‌ڤده‌م دگه‌ل جێبه‌جێكرنا قانوونێن كارێ خوه، گه‌له‌ك ته‌كه‌زێ ل پاراستنا ئیتیكێ پیشه‌یێ خوه دكه‌ت.
پێگیره ب بنه‌مایێن ئیتیكێن كارێن رۆژنامه‌ڤانی، سۆزنامه و شه‌ره‌فنامه‌یێن رۆژنامه‌ڤانی ئیمزا دكه‌ت و بخواستاخوه پێگیر دبیت و چۆ بنه‌مایێن ره‌وشتیانه پنپێ ناكه‌ت. ده‌مێ رۆژنامه‌ڤانی ب ڤی ره‌نگی خوه په‌روه‌رده‌كر و بڤی ره‌نگی كارێ خوه كر، دێ بیته جهێ باوه‌ریا وه‌لاتیان، دڤێت هه‌موو هه‌ولێن رۆژنامه‌ڤانی بۆ وێ چه‌ندێ بن كو راستبێژانه كاربكه‌ت و جهێ باوه‌ریا خه‌لكی بیت داكو په‌یام و كارێن وی یێن رۆژنامه‌ڤانی بچنه ناڤ خه‌لكی و كاریگه‌ری هه‌بن و رایا گشتی درووست بكه‌ن.
ئه‌ركه رۆژنامه‌ڤان راستیان بێخنه به‌رچاڤ، ده‌ستهه‌لاتێ ناچار بكه‌ن وكێموكاسیێن خوه باش بكه‌ن، ئاستێ هۆشیاریا تاكی بلند بكه‌ن، لێ دیارده‌كا سه‌یر په‌یدابوویه، تێبینی دهێته كرن هنده‌ك رۆژنامه‌ڤان بۆ بده‌ستڤه‌ئینانا ده‌ستكه‌ڤتێن ماددی یێن زێده‌تر، ژ بیر كریه كو ئه‌و رۆژنامه‌ڤانن، خوه وه‌ك كاراكته‌رێن بازاری دبینن، یان چالاكڤانێن جڤاكێ مه‌ده‌نی، یان حه‌زا بزنسێ هه‌یه و دخوازن برێیا كارێ رۆژنامه‌ڤانی بگه‌هنه ئارمانجێن خوه یێن كه‌سۆكی و تایبه‌ت.
بۆ وێ ئارمانجێ مفا ژ ناڤوده‌نگی، یان په‌یوه‌ندیێن خوه وه‌ردگرن كو ب رێیا كارێ رۆژنامه‌ڤانی بده‌ستڤه‌ئینایه، نیڤا رۆژێ مژوولی كارێ رۆژنامه‌ڤانی نه، پاشی وه‌ك كاراكته‌رێن بوارێ ریكلامێن بازرگانی كار دكه‌ن.
ئه‌ڤ جۆره كاركرنه، دگه‌ل رووحیه‌تا كارێ میدیایێ ئێك ناگرن، چنكو رۆژنامه‌ڤانه‌ك كو خه‌لكێ گه‌له‌ك چاڤه‌رێبوون ژێهه‌نه كو راستیان بۆ ئاشكرا بكه‌ت و لدووڤ زانیاریێن هوور یێن ئاریشه‌یان بچیت و چاره‌سه‌ریان به‌رچاڤ بكه‌ت، لێ ل تیڤییان دبینن كو ئه‌و رۆرژنامه‌ڤان بۆ دایبی، شیر، شامپۆ، سابوون، جوانكارییان، خوارنگه‌هـ و كه‌لوپه‌لێن بازرگانی ریكلامان دكه‌ت، ئه‌ڤ جۆرێ كه‌سان باشتره خوه ژ كارێ رۆژنامه‌ڤانی دووربكه‌ن، چنكو ئێدی نه جهێ باوه‌ریا وه‌رگرو بینه‌رانه.
شوونا كارێ رۆژنامه‌ڤانی بكه‌ی، مژوولی ریكلامێن بازرگانی، مژوولی نیشاندانا كه‌لوپه‌لێن سه‌خته‌ی و ته‌دڤێت ل شوونا خوانده‌ڤان و بینه‌ر كارێن ته یێن رۆژنامه‌ڤانی ببینن تۆ وه‌ك كاراكته‌ره‌ك و نمایشكه‌ره‌ك روله‌كێ نا واقعی نیشان دده‌ی، یێن مژوولی ڤی جۆرێ كاری بن چۆ ده‌مان نه‌شێن خوه لژێر سیوانا كارێ رۆژنامه‌ڤانی ڤه‌شێرن، چنكو وان هه‌موو خه‌سله‌تێن میدیاكار و رۆژنامه‌ڤانیێ ژ ده‌ست داینه.
*ماموستا و ڤه‌كۆله‌رێ بوارێ راگه‌هاندنێ
رۆژنامه‌ڤان نابیته كه‌لوپه‌ل پیشه‌ییانه كار دكه‌ت
كۆمێنتێ بجهـ بهێله
كۆمێنتێ بجهـ بهێله