گۆتار، رامان مەجید
ئەوا ئۆجەلان گۆتی(بەرپرسیارەتییێ دێ هەلگرم) ئەردۆگان و باخچەلی نەشیان بێژن. ئۆجەلان ئازایانە پێنگاڤا ئێکەم یا راگەهاندنا ئاشتییێ دەست پێکر. د قۆناغەکا هەستیار و چارەنڤیس دا هەلگرتنا بەرپرسیارەتییێ(سەرکردە دڤێت نەک سەرۆک).
ئەوێ بەرگری نامەیێن ئۆجەلان خواندبن دزانیت ئۆجەلان ب کووری و هووربینی دڤێت کوردان ل رۆژهەلاتا ناڤەراست بگەهینیت کیڤە. باش د سیستەمێ حکومرانییا جیهانێ و پێگەهێ حزبا خوە دگەهیت، ئەوژی د گۆهەرتنێن پاشەڕۆژا ڤێ دەڤەرێ دا هەم ژ لایێ چەکداری و تێکەلبوون دگەل سیستەمی تێگەهشتییە و دزانیت ئەنجامێ وێ دێ چ بیت.
ئەوا ئۆجەلان گۆتی ڤەکرنا دەستپێکێ یا ئێکەم گرێیا دانوستاندنانە کو هیچ سەرۆک و سەرکردەکێ ترکیا ئازایەتی و جۆرئەتا وێ چەندێ نەبوو کو ئێکەم گرێ ڤەکەت ئەوژی ژ ترسا دەنگدەران.
بۆ دەستپێکرنا شەڕی ئێک فیشەک بەسە، لێ بجهـ هینانا ئاشتییێ سەدان گاڤ دڤێن، ئاشتی بجهـ بهێت یان نە، ئۆجەلان پەکەکە برە قۆناغەکا گەلەک بلندتر یا خەباتێ، ژ قەیرانا ڤەدەرکرنا سیاسی و دیبلۆماسی دوورکر، رەنگە پاشەڕۆژێ پەکەکە ب فۆرم و ناڤەکێ دی بهێتە مەیدانێ. ئەوژی بۆ رێ گرتن ژ دووبارە دابەشبوونا کوردان و بکارهینانا وان ژ لایێ زلهێزان و فرۆتنا وان لژێر مێزێن دانوستاندنان ب دەولەتان.
ئەو خواندنێن هوور یێن ئۆجەلان دەربارەی دیرۆکا سۆمەڕیان تا سەدێ بیستێ و رەخنەکرنا فکرا هیگل بۆ دەولەتێ و درووستبوونا سیستەمێ سەرمایەداری و هەڤدەم درووستبوونا سیستەمێ دەولەت نەتەوە و رەخنە ل فکرا مارکس و سۆسیالیزما لینین کو د ئەنجام دا ب شکەستن ب دوووماهیک هات. دبێژیتە مە کو ئەڤ سەرکردە کوورتر ژ هەر سەرۆک و سەرکردەکێ دی لسەر پاشەڕۆژا ڤێ دەڤەرێ یێ هایدارە و بەرچاڤێن وی د رۆنن و دزانیت چ چێدبیت و چ ئەرک بەرامبەر گەلێ وی لسەر ملێن وییە و دڤێت ئەنجام بدەت، نەوەکو لژێر گڤاشتنان، یان ب حەزا خوە رەفتارێ بکەت و گاڤان بهاڤێژیت. وی دڤێت کوردان بهینیتە ناڤ سیستەمی، چنکو سەد سالا دەربازبوویی ژ سیستەمی هاتبوو دەرکرن.
حزب و رێبەرێ وێ باش د فکر و زمانێ ئێک دگەهن، دا ئەم ژێڤەببین ئەو دزانن دێ چەوا بڕیارێ دەن.