له‌ز، دهۆك
ئه‌ندامه‌كێ پارتى ل جڤاتا نوونه‌رێن ئيراقێ راگه‌هاند:”مه كێشه‌يا ته‌وتين چاره‌سه‌ر كرييه، ئه‌گه‌ر به‌غدا مووچه‌يێن هه‌رێمێ ژ به‌ر ته‌وتين نه‌هنێريت ژبه‌ر به‌هانه‌يێن سياسييه”.
چيا ته‌يمۆر، بۆ له‌ز ميديا گۆت:”بانكێن رافيده‌ين و ره‌شيد ل هه‌رێما كوردستانێ لق نينن، له‌وما حكومه‌تا هه‌رێما كوردستانێ بۆ چاره‌سه‌ركرنا ته‌وتين، رێككه‌ڤتن دگه‌ل بانكا بازرگانييا ئيراقێ هه‌يه كو نيمچه حكومييه، ديسان رێككه‌ڤتن دگه‌ل ژماره‌كا بانكێن دى هه‌يه كو هه‌موو ژلايێ بانكا ناڤه‌ندييا يا ئيراقێ مۆله‌تداينه”.
ده‌رباره‌ى مه‌رجێن ئيراقێ بۆ راده‌ستكرنا داهاتێ نانه‌فتى، ناڤبوورى خوه‌ياكر:” د ياسايا مالى دا ل سالا 2021 هاتييه؛ نيڤه‌ك دێ بۆ هه‌رێما كوردستانێ بيت و نيڤه‌ك دێ بۆ ناڤه‌ندى بيت، له‌وما داخوازكرنا نيڤه‌ك ژ ڤى داهاتى ژلايێ به‌غدا كاره‌كێ ئاساييه”.
ته‌يمۆر دازانين:”داهاتێن گۆمركان دچنه دچوارچووڤێ داهاتێن نانه‌فتى دا و لدووڤ ياسايا بوددجێ؛ هه‌رێم ئاماده‌يه 400 هزار به‌رميلان ژ نه‌فتێ راده‌ست بكه‌ت و به‌غدا 12.67% ژ بوددجێ بده‌ت هه‌رێمێ كو دبنه 22 ترليۆن دۆلار، لێ وه‌زاره‌تا دارايى يا ئيراقێ بتنێ چوار تڕليۆن داينه هه‌رێمێ”.
ده‌ره‌باره‌ى نه‌فتێ ژى هه‌رێما كوردستانێ ئاماده‌يه نه‌فتێ راده‌ستى كۆمپانييا سۆمۆ بكه‌ت، لێ به‌غدا نه‌شێت وه‌رگريت و بازارى بۆ په‌يداكه‌ت”.
وه‌زاره‌تا دارايى يا ئيراقێ بوددجه‌يا هه‌رێما كوردستانێ ل هه‌يڤا ئايارا ئه‌ڤ ساله راگرت و هه‌تا نوكه هيچ پاره‌يه‌ك بۆ هه‌رێمێ نه‌هنارتييه و مووچه‌خۆرێن هه‌رێمێ مووچه‌يێ هه‌يڤا ئايارێ نه‌وه‌رگرتييه.