له‌ز، دهۆك
پرۆژێ هایدرۆپاوه‌رێ دێره‌لۆك (سكرێ گه‌لیێ ره‌شاڤا) كو لسه‌ر رووبارێ زێیێ مه‌زن هاتییه چێكرن ژ شیيانێن 37.8 مێگاواتێن كاره‌بێ، بتنێ 7 مێگاواتێن كاره‌بێ به‌رهه‌م دئینیت و لدووڤ گۆتنێن شاره‌زایه‌كێ سكران”به‌رهه‌مئینانا كاره‌بێ ل ڤی سكری سه‌ركه‌ڤتی نه‌بوویه”.
سالا 2022، پرۆژێ هایدرۆپاوه‌رێ دێره‌لۆك كه‌ڤته كاری، لدۆر به‌رهه‌مێ كاره‌با وی پرۆژه‌ی شاكر مه‌حمود، رێڤه‌به‌رێ گشتی یێ كاره‌با پارێزگه‌ها دهۆك، بۆ له‌ز میدیا خوه‌یاكر:”ژبه‌ر كێمبوونا ئاڤا رووبارێ زێ مه‌زن، به‌رهه‌مێ كاره‌با سكری كێم ژ نێزیكی 38 مێگواتان بوویه 8 مێگاوات”.
لدووڤ زانیاریێن له‌ز میدیا، نووكه پشكه‌كا وه‌لاتیێن ناحیه‌یێن دێره‌لۆك و ده‌ڤه‌رێن نێزیكی دێره‌لۆك مفای ژ كاره‌با سكرێ گه‌لیێ ره‌شاڤا وه‌ردگرن.
ده‌رباره‌ی هه‌مان پرۆژه د. ره‌مه‌زان هه‌مزه، شاره‌زایێ جیلۆجی و سكران و رێڤه‌به‌رێ په‌یمانگه‌ها ستراتیژی بۆ پرسێن ئاڤێ و ئه‌نه‌رژیێ بۆ له‌ز میدیا گۆت:”ده‌ستكه‌ڤت و به‌رهه‌مێن پرۆژێ هایدرۆپاوه‌رێ دێره‌لۆك نه ل ئاستێ وان خه‌رجیانه یێن ل سكری هاتینه كرن و گه‌له‌ك كێمترن”.
ناڤبووری گۆت ژی”ئه‌ڤ پرۆژه ل جهه‌كێ نه‌درووست هاته چێكرن، جهه‌كێ گۆنجاییتر هه‌بوو بۆ چێكرنا سكری بتایبه‌ت نێزیكی (خوارنگه‌ها به‌ڕۆ) كو دا پتر كاره‌بێ به‌رهه‌م ئینیت و كه‌رتێ گه‌شتیاری ژی دا پتر وفای ژێ بینیت”.
لدووڤ زانیاریێن له‌ز میدیا؛ هه‌تا نووكه چۆ پرۆژێن گه‌شتیاری ل نێزك ڤی سكری نه‌هاتینه چێكرن و كاره‌با سكری ژی ژ 8 مێگاواتێن كاره‌بێ زێده‌تر نه‌بوویه.
بلنديیا سكرێ گه‌لییێ ره‌شاڤا 18 مه‌ترن، ئێكه‌م پرۆژێ هایدرۆ پاوه‌ره ل دهۆك، سالا 2016-ێ، ژ دوو یه‌كه‌یێن كاره‌بێ پێك دهیت، كۆمپانیێن(بلند پایه) یا وه‌لاتێ ئیرانێ و كۆمپانیا (ڤاراب گرۆپ) یا وه‌لاتێ كوێت، ل ژێر سه‌رپه‌رشتییا كۆمپانییه‌كا ئیتالی و ئه‌ندازیارێن حكومه‌تا هه‌رێما كوردستانێ پرۆژه چێكر.
حكومه‌تا وه‌لاتێ ژاپۆن ب رێیا ئاژانسا جایكا ب قه‌رزێن ده‌مدرێژ ب 129 ملیۆن دۆلاران پشته‌ڤانیا ئه‌نجامدانا ڤی پرۆژه‌ی كربوو.