له‌ز، دهۆك
ده‌سته‌یا ئابووری ل رێڤه‌به‌رییا خوه‌سه‌ر ل باكوور و رۆژهه‌لاتێ سوریایێ، راگه‌هاند: ئه‌و ئاماده نینن نوكه په‌زی و كه‌والان بۆ پارێزگه‌ها دهۆك بهنێرن.
ژبه‌ر گه‌له‌ك داخوازیێن وه‌لاتییێن دهۆك لسه‌ر گۆشتێ سۆر و نه‌هاتنا په‌زی ل رۆژئاڤایێ كوردستانێ، ل بازارێن سنوورێ پارێزگه‌ها دهۆك، ئێك كیلۆیا گۆشتێ سۆر هه‌تا 18 هزار دینارێن ئیراقی بلند بوویه.
سلێمان بارۆدۆ، به‌رپرسێ ده‌سته‌یا ئابووری ل رۆژئاڤایێ كوردستانێ، بۆ له‌ز میدیا گۆت:” رۆژا 5-ێ ئادارا ئه‌ڤ ساله، ده‌سته‌یا ئابووری فرۆتنا گۆشتی بۆ باشوورێ كوردستانێ قه‌ده‌غه‌كر و ئه‌م ئاماده‌نینن ڤێ قۆناغێ هه‌تا ده‌مه‌كێ نه‌دیار په‌زی و كه‌والان بهنێرین هه‌رێما كوردستانێ”.
ناڤبۆری خوه‌یاكر:”ژبه‌ر وه‌رزێ زایینا په‌زی ل رۆژئاڤایێ كوردستانێ و بلندنه‌بوونا به‌هایێ گۆشتی ل سنوورێ رێڤه‌به‌رییا خوه‌سه‌ر ل باكوور و رۆژهه‌لاتێ سوریایێ، ئه‌و رێ ناده‌ن بازرگانییا په‌زی دگه‌ل دهۆك بهێته ئه‌نجامدان”.
به‌ری نوكه، ل ده‌رگه‌هێ سێمالكا، وه‌ك گه‌له‌ك بازرگانیێن دی، بازرگانییا په‌زێ نێر و كه‌والێن نێر ژی دگه‌ل دهۆك دهاته ئه‌نجامدان، بۆ سه‌رێ هه‌ر په‌زه‌كێ بازرگانان 10 هزار دینار وه‌ك گۆمرك ددانه رێڤه‌به‌رییا گۆمركا سێمالكا یا سه‌ر ب گۆمركا ئیبراهیم خه‌لیل ڤه.
لدووڤ زانیاریێن وه‌زاره‌تا چاندنێ یا حكومه‌تا هه‌رێما كوردستانێ؛ دهۆك ژ به‌رهه‌مێ ناڤخوه دشێت سالانه نێزیكی 50% ژ پێدڤیێن گۆشتێ سۆر بۆ بازارێن دهۆك دابین بكه‌ت، له‌وما ژ نه‌چاری گۆشتێ سۆر ئانكو په‌ز و كه‌وال ژ ده‌رڤه دهێن دهۆك، سالانه دهۆكێ پێدڤی ب نێزیكی 20 هزار ته‌نێن گۆشتێ سۆر هه‌یه.