له‌ز، زاخۆ
ل قه‌زا باتووفا ل سنوورێ ئیدارا سه‌ربخوه یا زاخۆ “بتنێ دوو نه‌خوه‌شخانه هه‌نه ئێك ژوان یا كه‌ڤنه و ده‌وم لێناهێته‌كرن و 12 ساله چۆ نه‌خوه‌شخانه ل وێ قه‌زایێ نه‌هاتینه ئاڤاكرن”.
پتر ژ ساله‌كێ یه باتووفا ژ ناحییه بوویه قه‌زا، لێ هه‌تا نوكه رێڤه‌به‌رییا ساخله‌میێ نینه، لدووڤ گۆتنێن ئیسماعیل سلێمان، فه‌رمانبه‌رێ نه‌خوه‌شخانه‌یا باتووفا بۆ له‌ز میدیا:”بتنێ چوار پزیشك ل نه‌خوه‌شخانا باتووفا كاردكه‌ن، دوو پزیشك دانێ سپێدێ و دوو پزیشك دانێ ئێڤاری هه‌تا شه‌ڤێ ده‌وامێ دكه‌ن”.
ده‌رباره‌ی خزمه‌تگۆزاریێن نه‌خوه‌شخانێ ناڤبووری خوه‌یاكر:”پشكێن گرنگ وه‌ك؛ پشكا سۆتنێ و دایكبوونێ ل نه‌خوه‌شخانێ نینن، لێ لدووڤ شیانێن به‌رده‌ست گه‌له‌ك جاران هاریكاریا نه‌خوه‌شان دكه‌ن”.
لدۆر مژارا پێدڤییا فه‌رمانبه‌ران بۆ نه‌خوه‌شخانا باتووفا، ڤی فه‌رمانبه‌رێ دازانین:” نوكه، بتنێ دوو نه‌خوه‌شخانه ل سنوورێ قه‌زا باتووفا هه‌نه، ئێك ژوان كه‌ڤنه و ده‌وام لێناهێته كرن، له‌وما ئيدارا سه‌ربخوه یا زاخۆ سۆزدایه كو نه‌خوه‌شخانه‌كا نوو ل باتووفا چێكه‌ن، هه‌تا ئه‌و نه‌خوه‌شخانه نه‌هێته چێكرن، ئه‌م نزانین كا دێ پێدڤییا مه ب چه‌ند پزیشك و په‌رستاران هه‌بیت”.
لدووڤ زانیاریێن له‌ز میدیا ژمارا وه‌لاتیێن، قه‌زا باتووفا پتر ژ 82 هزار و 558 كه‌سانه و بۆ پترییا چاره‌سه‌ریێن پزیشكی، وه‌لاتی قه‌ستا نه‌خوه‌شخانه‌یێن ئیدارا سه‌ربخوه یا زاخۆ و پارێزگه‌ها دهۆك دكه‌ن.