له‌ز، زاخۆ
لدووڤ زانیاریێن په‌یامنێرێ له‌ز میدیا كو ژ ژێده‌ره‌كێ تایبه‌ت ل په‌روه‌رده‌یا ئیدارا سه‌ربخوه یا زاخۆ وه‌رگرتینه، په‌روه‌رده‌یا زاخۆ پێدڤی ب دامه‌زراندنا 2500 ماموستایان و 500 فه‌رمانبه‌ران هه‌یه.
ده‌رباره‌ی ژمارا مامۆستایێن زاخۆ ژێده‌رێ له‌ز دازانین:”ژمارا مامۆستایێن زاخۆ 3271 مامۆستانه و پێدڤییا په‌روه‌ردا زاخۆ ب دامه‌زراندنا 2500 مامۆستایێن دی هه‌یه، دهه‌مان ده‌مدا ژماره‌یا وانه‌بێژان ژی 2025 مامۆستانه”.
وی ژێده‌ری خوه‌یاكر:”نوكه، 210 قۆتابخانه و باخچه ل سنوورێ په‌روه‌رده‌یا زاخۆ هه‌نه، د چه‌ند سالێن ده‌ربازبوویی دا 8 قۆتابخانه ئه‌وێن ل گوندان ژبه‌ر ژمارا كێم یا قۆتابییان ده‌واما وان هاتییه راگرتن، هه‌رچه‌نده ل سالا 2018 -ێ، هه‌تا نوكه 12 قۆتابخانێن نوو ل زاخۆ هاتینه چێكرن، لێ هێشتا پێدڤییا زاخۆ ب 15 قۆتابخانێن دی هه‌یه”.
لدۆر ژماره‌یا فه‌رمانبه‌ران زه‌لالكر:”ژمارا فه‌رمانبه‌رێن په‌روه‌ردا زاخۆ 612 فه‌رمانبه‌رن كو پێدڤییا په‌روه‌ردێ ب دامه‌زراندنا 500 فه‌رمانبه‌رێن دی هه‌یه”.