له‌ز، دهۆك
رێڤه‌به‌رێ دارستان و پاوانان ل سنوورێ پارێزگه‌ها دهۆك، راگه‌هاندن: سالانه، نێزكیی 30 هزار دۆنه‌مێن ژینگه‌ها سرۆشتی یا پارێزگه‌ها دهۆك ب مه‌به‌ست و زانه‌بوون دهێته سۆتن.
كاوه سه‌بری، رێڤه‌به‌رێ دارستان و پاوانان بۆ له‌ز میدیا گۆت:”ل سنوورێ پارێزگه‌ها دهۆك، 1 ملیۆن و 700 هزار دۆنه‌مێن دارستانان هه‌نه كو ل ڤان سالێن دووماهییێ گه‌له‌ك مه‌ترسیی كه‌ڤتینه سه‌ر وه‌ك؛ مه‌ترسیێن به‌ربوونا ئاگران و بڕینا دارستانان”.
ناڤبۆری خوه‌یاكر:”سالا 2022-ێ، نێزیكی 30 هزار دۆنه‌مێن ژینگه‌هـ و دارستانان و سالا 2021-ێ، 28 هزار دۆنه‌م سۆتبوون، ئه‌گه‌رێن سه‌ره‌كی ژی؛ هێرشێن تركیا و ئاگرێن وه‌لاتیێن مه بوون”.
ده‌رباره‌ی هه‌مان مژار، مقه‌ده‌م سیهامه‌ددین عه‌لی، هاریكارێ هێزا دهۆك یا پێشمه‌رگه‌یێن پاراستنا ژینگه‌هێ ل زاویته بۆ له‌ز میدیا گۆت:”هه‌رچه‌نده هه‌ماهه‌نگییه‌كا باش دناڤبه‌را ده‌زگه‌هێن په‌یوه‌ندیدار یێن ژینگه‌هێ هه‌یه، لێ ئه‌و نه‌شییاینه رێگریێ ل سۆتن و ژناڤچوونا دارستانان بكه‌ن، چنكو هه‌موو كار د شیانێن وان دا نینن وه‌ك؛ رێگرییا ل سۆتنا دارستانێن سنووری ژ‌به‌ر هێرشێن تركیا”.
ناڤبۆری دازانین:”زێده‌باری ئه‌نجامدانا ئه‌ركێ پێشمه‌رگایه‌تیێ و كارێ ئاسایی یێ له‌شكه‌ری، تیمێن پێشمه‌رگه‌یێن وان به‌رده‌وام دووڤچوونا سه‌رپێچكاران دكه‌ن، گه‌له‌ك جاران ژی ب شیانێن خوه یێن ده‌ستپێكی و كلاسیك یێن بابوباپیرێن كوردان ئاگران د ڤه‌مرینین و ناهێلین زرارێن ئاگربه‌ربوونان گه‌له‌ك مه‌زن ببن”.
نێزیكی 30% ژ رووبه‌رێ سرۆشتی یێ پارێزگه‌ها دهۆك، دارستانن بتایبه‌تی ل سنوورێ د ناڤبه‌را دهۆك و باكوورێ كورستانێ دا.