لەز، دهۆک
بۆ چێکرنا کۆمەلگەهەکا رەوشەنبیری و هونەری ل رۆژهەلاتێ پارێزگەها دهۆک، پتر ژ ۱۲ سالانە، ٤۳ دۆنەمێن ئەردی لسەر ناڤێ رێڤەبەرییا رەوشنبیرییا گشتی یا دهۆک هاتینە تاپۆکرن، لێ بتنێ ئاڤاهییێ رەوشەنبیری لسەر وی ئەردی هاتییە چێکرن.
ئەمیر عەلی، رێڤەبەرێ گشتی یێ رەوشەنبیری و هونەری ل دهۆک، بۆ لەز میدیا گۆت:” ئەڤ ٤۳ دۆنەمێن ئەردی بۆ چێکرنا چەند ئاڤاهییێن رێڤەبەریێن دی یێن هونەری لسەر ناڤێ رەوشنبیریا دهۆک هاتبوون تاپۆکرن، لێ هەتا نووکە لایەنێن پەیوەندیدار ئەو شییاێن ماددی نەبووینە کو ئەو ئاڤاهی بهێنە چێکرن”.
ناڤبۆری گۆتژی:”ئەگەر ئەڤ کۆمەلگەهە بهێتە چێکرن دێ ئەڤ رێڤەبەرییە هەبن؛ هونەرێ شانۆ و میۆزیک و تیپێن مللی، چەندین هۆلێن چالاکیێن رەوشەنبیری و هونەری و پرۆڤەیان و مژارێن گرێدای هونەری، لێ ژبەر شەڕێ داعش و قەیرانێن ئابووری کار لسەر ڤی پرۆژەی نەهاتە کرن”.
لدۆر هەمان مژار، بریندار مەعرۆف، رێڤەبەرێ باژێڕڤانییا رۆژهەلات بۆ لەز دازانین:”سالال ۲٠۱٠ ـ ێ، ئەڤ ٤۳ دۆنەمێن ئەردی لسەر ناڤێ وەزارەتا وەرزش و لاوان و رێڤەبەریا رەوشەبیری هاتبوون تاپۆکرن و بتنێ وێ رێڤەبەرییێ مافێ دەستکارییا وی ئەردی هەیە”.
سالێن دەربازبوویی، ژبەر شەڕێ داعش و قەیرانێن دارایی، گەلەک چالاکییێن هونەری و رەوشەنبیری ل سنوورێ پارێزگەها دهۆک کێم بوون، بتایبەت چالاکییێن تیپێن مللی.